Avia nu sciccareddu
davveru sapuritu
ora mi l'ammazzaru
poviru sceccu miu
chi bedda vuci avia
paria nu gran tinuri
sciccareddu di lu me cori
comu ju t'hai a scurdari
e quannu cantava facia:
iha, iha, iha...
sciccareddu
di lu me cori
comu ju t'hai a scurdari
Quannu 'ncuntrava 'ncumpagnu
subitu lu ciarava
e dopu lu raspava
ccu granni carità
chi bedda vuci avia
paria nu gran tinuri
sciccareddu di lu me cori
comu ju t'hai a scurdari
e quannu cantava facia:
iha, iha, iha...
sciccareddu
di lu me cori
comu ju t'hai a scurdari
Mi votu e mi rivotu
Raccolta-Frontini
Mi votu e mi rivotu suspirannu
passu la notti 'nterra senza sonnu
e li biddizzi toi jeu cuntimplannu
mi passa di la notti sina aghiornu
Pri tia nun pozzu n'ura ripusari
paci nun havi cchiù st'affrittu cori
lu sai quannu jeu t'haju a lassari ?
quannu la vita mia finisci e mori
Ni Tia
Di Mauro
Supra sta timpa c'è lu
paradisu
pirchì ci stai tu rosa odurusa
lu cori e l'occhi me cci l'haiu 'ntrisu
pi sta biddizza opira di Diu.
Sti zagari e sti
lumei
adornunu stu munnu
unni li sogni mei
ci tressunu 'nprufunnu
sti notti senza fini e ne riposu
s'affunnunu 'nda st'occhi unni ci posu
Fammi passari na nuttata sana
'ntra li to brazza stritta a lu to cori
fammi pruvari tu , fata Murgana
comu si campa e poi comu si mori
Sti zagari e sti lumei
adornunu stu munnu
unni li sogni mei
ci tressunu 'nprufunnu
sti notti senza fini e ne riposu
s'affunnunu 'nda st'occhi unni ci posu
Ni tia, ni tia, ni tia, ni tia...
Ciuri Ciuri
Raccolta Frontini
Ciuri, ciuri, ciuri di tuttu l'annu
lu meli siti e lu pani cci abbagnu
Ciuri, ciuri, ciuri di camumidda
stanotti mi 'nsunnai d'amari a Pidda
Ciuri, ciuri, ciuri di primavera
si tu non m'ami ju moru di pena
Lumia 'Nzuccarata
Calì-Ranfaldi
Lui: Cummari, li lumia mentri cugghiti
pirchì 'ss'aranci 'npettu v'ammucciati ?
cchiù duci e frisca di l'aranci siti
'sta vampa 'ntra lu cori m'astutati.
Lei: Ppi vui non sugnu aranci ma
limuni
di chiddi a dui tri soddi 'ntra lu chianu;
cc'è l'acitu ca liga li scagghiuni
guardari mi putiti di luntanu.
Lui: Cummari, ca l'aranci ora 'ncartati
pirchì li so biddizzi cci cupriti ?
certu ca vui, si senza velu stati
assai cchiù bedda all'occhi cumpariti.
Lei: Cumpari, assai di longu vi
sbagghiati
ca senza veli nuddu mi viditi;
d'avirimi accussì non lu spirati
si zagara a lu velu 'un ci mittiti.
Coro: Si non si paga si duna lu
pignu
'ntra 'sta putia cridenza non c'è;
prima videmu si vannu d'accordu,
e doppu appressu, lu pattu si fa.
Simenza Bedda
Calì-Ranfaldi
Simenza bedda, chi torni alla terra
d'unni nascisti 'ntra la brunna spica
dicci a la matri to 'ca 'ntra lu pettu
ti stringi e ti nutrica.
Ca non ti lassa ccà morta di siti
dicci all'acqua ca dormi 'ntra lu celu
dicci alla stati e allu 'nvernu ca non manna
sciroccu e gelu!
Bum! Passa Lu Santu Trovato Francesco
Mittitimi mammà li robbi
novi
ca oggi è la festa di lu santu
mittitimi pinnenti di girasa
e ciuri russi 'nmezzu a li capiddi.
Bum! passa lu santu
botta 'e vilenu matri chi scantu
dici lu previti supra la vara
ca li bummi non reggi cchiù
e attaccannu na litania
s'arraccumanna a matri Maria.
E calia e simenza vinni vinnu..
matruzza mia si persi u picciriddu
fra fumu, bummi e vuci di la genti
lu santu resta mutu... 'ndifferenti
'Ccattatimi palluni e palluncini
unn'è ca c'è la testa di lu santu
pigghiati li cchiù granni fra di chiddi
ca mi c'iappennu e abbolu fra li stiddi
Bum! passa lu santu
leviti 'i docu fatti di cantu
puru la banna non sona cchiù
'ntisi li bummi e s'incagnò
e ghisannu li nasi all'aria
vaddamu 'ncelu la luminaria.
E calia e simenza vinni vinnu
signura cchi è u sò stu picciriddu
fra tantu bailamme zittu zittu
s'annaca 'npocu u santu... e tira o rittu.
Sturnillata Dispittusa
Calì-Grasso
Lui: Ciuri di rozza spica e marvarosa
si ccu li donni voi pigghiari 'mprisa
perdi la testa e ti vota la casa
Lei: Ciuri di pipi ardenti e mulinciana
siti cchiù bruttu di 'na siritina
di 'nvernu forti ccu li lampi e trona
Lui: Ciuri di nipitedda e di 'nzalora
li fimmini sù tutti curtigghiara
linguti sparritteri e 'ntricalora
Lei: Ciuri di menta sicca e paparini
l'omini comu a vui 'ccussi cafuni
ni li stricamu sutta li tappini.
