Ccu 'ssa funcia ca mi teni
mi fai propriu siddiari
si daveru mi voi beni
cchiù 'ssa funcia non l'ha fari
Cchi t'ha fattu finarmenti
ca cchiù cuntu non mi duni
cridi a mia ca non c'è nenti
si ti dugnu 'npizzuluni
'Npizzuluni cchi cci fà ?
tu mi dici ca non stà
iu ti dicu 'nveci si
e l'amuri si fà accussì
Quannu ss'occhi marioli
supra l'occhi me riposi
senza diri dù paroli
sannu diri tanti cosi
Hannu lampi di disiu
di sprinnuri fannu sfrazzu
ti taliu, ti taliu
finu a quannu ca t'abbrazzu
Si t'abbrazzu cchì cci fà ?
tu mi dici ca non stà
iù ti dicu 'nveci si
e l'amuri si fà accussi
'Nta 'ssa vucca 'nzuccarata
quannu parri arrestu appisu
si mi fai 'na risata
mi n'acchianu 'nparadisu
Vucchi nichi non n'ha' vistu
comu a chissa ch'è n'aneddu
e perciò ca sempri 'nsistu
ppi scippari 'n vasuneddu
'N vasuneddu cchì cci fà ?
tu mi dici ca non stà
iù ti dicu 'nveci si
e l'amuri si fà accussi
Non lu sapiti
Esposito-Maglia
Non lu sapiti l'amuri ca v'haiu
e non sapiti quantu vi disiu
non lu sapiti comu chiangiu e staiu
quann'è ca ppi mumentu non vi viu
Dintra di l'arma mia na vampa cci haiu
e lu me cori è vostru e non lu miu
si moru 'nparadisu non ci vaiu
pirchì p'amari a vui non pensu a Diu
E vui sapennu st'amuri e sti peni
mi lassati muriri comu 'ncani
ma oggi siddu cc'è cu vi tratteni
speru di cunvincirivi dumani
Cchiù non m'amati e cchiù vi vogghiu beni
chiù passa e chiù vi mannu cristiani
non mi lassati amuri 'ntra sti peni
pirchì siti ppi mia l'acqua e lu pani
Cummari Nina
Raccolta- Frontini
Cummari Nina,
cummari Nina, Cummari Vicenza
mittitivi a lenza cca nasci u 'nguà 'nguà
Havi sett'anni
havi sett'anni ca sugnu maritata
'non passa 'stannata mi chiamu mamà
S'è masculiddu,
s'è masculiddu lu mannu a la scola
su è fimminedda quasetta si fà
A Pampina
trittico-raccolta Frontini
E la pampina di l'alivu
di l'alivu la pampina
veni lu ventu la cutulia
la cimiddia cascari la fa
La VO'...
Calì-Impellizzeri
Binidissi lu journu e lu mumentu
tò matri, quannu a latu ti truvò
doppu di novi misi, ccu gran stentu
'nguà 'nguà facisti, e 'n frunti tì vasò
Dormi nicuzzu ccu l'angili tò...
dormi e riposa, ti cantu la vò...
vò... vò... vo...
dormi, beddu fa la vò...
Si di lu celu calassi 'na fata,
non lu putissi fari 'ssu sblinnuri
ca stà facennu tu, biddizza amata,
'ntra ssà nacuzza di rosi e di ciuri
Dormi nicuzzu ccu l'angili tò...
dormi e riposa, ti cantu la vò...
vò... vò... vò...
dormi beddu e fa la vò...
A la Nicusiana
Molino-Pastura
Ora ch'è 'n festa la chiana
e lu mari
e 'ntra li spichi lu frummentu 'ngrana,
dintra 'sta massaria amu a cantari
canzuni a stagghiu a la "nicusiana".
Saridda è tantu vucitara e pazza
c'ammatula s'ammela la vuccuzza:
non pò canciari, mancu si s'ammazza!
falla comu la voi... sempri è cucuzza
Ccu 'ss'occhi beddi toi lu suli astuti,
ccu 'ss'occhi spataioli e ammavarati...
Quannu mi guardi ccu 'ss'occhi pizzuti
mi sentu ccu li causi strazzati
Cci haju 'na zita ca si chiama Nedda
bedda di facci ma senza midudda.
Cci addimannai 'n vasuni, ma 'sta bedda
mi dissi: "No...,pirchì mangiai cipudda..."
Cchiù ti taliu e cchiù addiventu siccu!
mi sentu ccu la testa dintra 'n saccu!
Ppi jiri appressu a tia persi lu sceccu
e ora ...a cui diavulu cravarcu?
Cantu di caccia
Menzu l'alivi na pirnici c'è
o pigghia la spagnola e torna arrè
cerc'a spagnola e portammilla ccà
e si non la trovi,allura luntanu sinni va
luntanu a la muntagna sinni va
Vicinu a na lumia na quagghia c'è
o pigghia la spagnola e torna arrè
cerc'a spagnola e portammilla ccà
e si non la trovi, allura la quagghia sinni va
la quagghia spalma l'ali e sinni va
Trilla-Trilla
Trilla, trilla, trilla, trilla
quannu passu di ca e non vidu a idda,
scurusa a mia mi pari sta vanedda,
ci spiu a li vicini unni è idda,
a missa sa purtaru a Pippinedda tirolla la,
tri-lla la tri-lla la
travagghia a machinedda
e Pippinedda l'amuri si fa
'Ntra Ville e Valli
popolare
'Ntra ville e valli e 'ntra boscura funni
unn'è l'amanti mia di ca spariu
la vaiu ppi circari e 'ntrovu dunni
pi lu so amuri lu munnu furiu
Vaiu a lu mari e c'addumannu a l'unni
forsi passau di ca l'amuri miu
e l'ecu di luntanu m'arrispunni ,
ca schiava di li turchi sinni iu
M'addisiassi la spada d'Orlandu
quantu girassi ppi tuttu lu munnu
la me Agatuzza mi mori chist'annu
cu t'affirrau ivì, iu mi cunfunnu.
Fu so mammuzza cu cori tirannu,
la mannò a mari a circari u nonnu
comu 'ncagghiasti ! 'Un sintisti u bannu ?
'un jiti a mari li turchi ci sunnu !
'ngnadduzzu
Popolare
L'aviti vistu ' ngnadduzzu cummari
ca ora ora passau di cca
iù cu stu iaddu non 'sacciu cc'à fari
ca notti e jornu 'npazziri mi fà
ah! chicchirichi
ti sentu cantari e non sacciu unni si
Cummari bedda, sbagghiasturu strata
ca lu so iaddu 'ssa d'unni pigghiò
circatavillu 'nda nautra cuntrada
no di sta strata sicuru passò
ah! chicchirichi
ti sentu cantari e non sacci' unni si
ci pirmittiti cummari ca trasu
c'à mia mi pari ca ciauru c'è
au si sbagghiati vi scippu lu nasu
genti cchiù onesta di mia non cci nè
ah! trasu...no.. no...
su 'npugnu di favi ca puddu purtò
chi favi ,latra e spacciata ca siti
e lu me iaddu ca ciauru fa,
a mia,linguta sti cosi diciti
a se vi pigghiu viniti cchiù cca
Ah! chicchirichi
ci persi lu iaddu e li quattru tarì
Mi Sconcica
Riela
Mentri 'ncartava aranci e mannarini
c'è Turi lu casciaru mamma mia
è tuttu u jornu ca mi cutturia
è 'nnamuratu e comu 'npazzu fa
Mi sconcica, mi sconcica, mi sconcica mamà
mentri ca travagghiava, mi dissi chistu cà:
ppi tia Rusidda spasimu, non ci la fazzu cchiù
bedda la vucca vasimi l'amuri miu si tu
Si seguita accussì occhè matina,
lu vasu si, ma a corpi di tappina
Mentri chiantava 'nchiou 'nda na cascia,
ppi taliari a mia s'astruppiau
e pu duluri na schigghia ittau
ppi tia Rusidda mi dissi ca fu
Mi sconcica,
mi sconcica, mi sconcica mamà
mentri ca travagghiava, mi dissi chistu cà:
ppi tia Rusidda spasimu, non ci la fazzu cchiù
bedda la vucca vasimi l'amuri miu si tu
Si seguita accussì occhè matina,
lu vasu si, ma a corpi di tappina
'Ntantu parrannu cu la viritati
a stari schetta cchiù non mi cummeni
dici ca maritati si sta beni
senza l'amuri lu munnu cchi è
Lu sconcicu,lu sconcicu, lu sconcicu mamà
senza cchiù tempu perdiri ci dicu chistu cà
ppi tia Turiddu spasimu non ci la fazzu cchiù
beddu la vucca vasimi, l'amuri miu si tu
E non lu vasu cchiù cu la tappina
ma cu la vucca di sira e matina
